pATal08
pATal07.html
pATal08.html
pATal09.html
ஏரெழுபது
மகாகவி கம்பர்
8. நுகத்தாணிச் சிறப்பு.
8. நுகத்தாணிச் சிறப்பு.
ஓராணித் தேரினுக்கும் உலகங்க ளனைத்தினுக்கும்
பேராணிப் பெருக்காளர் பெருமைக்கு நிகருண்டோ
காராணிக் காவேரி வளநாடர் உழுநுகத்தின்
சீராணிக் கொப்பதொரு சிறந்தாணி செப்பீரே.
(இ—ள்.) ஓர் ஆணி தேரினுக்கும் — ஒரே அச்சாணியைக் கொண்ட சூரியனுடைய தேருக்கும், உலகங்கள் அனைத்தினுக்கும் — எல்லாவுலகங்கட்கும், பேர் ஆணி — பெருத்த தேராணிபோன்று தாங்கவல்லவரான, பெருக்கு ஆளர் — செல்வப்பெருக்கை யுடையவரான வேளாளரின், பெருமைக்கு, நிகர் — ஒப்பு, உண்டோ? — [இல்லை); (அவ்வாறே), கார் ஆணி — மேகத்தை ஆதாரமாகக் கொண்ட, காவேரி — காவிரி பாயப்பெற்ற, வளநாடர் — வளப்ப முள்ள சோழநாட்டவரான வேளாளர், உழும் — உழுவதற்குக் காரணமான, நுகத்தின் — நுகத்தடியிலுள்ள, சீர் ஆணிக்கு — சீர்மை பொருந்திய ஆணிக்கு, ஒப்பது — ஒப்பதாகிய, ஒரு சிறந்த ஆணி — ஒரு சிறந்த ஆணியை, செப்பீர் — சொல்லுங்கள்; (எ-று.)
வேளாளர்பெருமைக்கு ஒப்பான பெருமையுடையார் இல்லாம லிருப்பது போலவே, நுகத்தாணிக்கு ஒப்பான ஆணியும் வேறு இல்லை யென்றவாறு: எடுத்துக்காட்டுவமையணி. சூரியனுடைய தேர் ஒற்றைத் தனியாழியை யுடையதாகையால், அதற்கு அச்சாணியும் ஒன்றேயா மென்பது குறித்து, “ஓராணித்தேர்” என்றார். ஆணிஎன்றசொல் இலக்கணையால், வெவ்வேறு பொருளை உணர்த்திற்று. உண்டோ, ஓகாரம் — எதிர்மறை. நிகர் — இடைச் சொல். சிறந்தாணி — பெயரெச்சத்தின் அகரவீறு தொகுத்தல். — (8)