Tamil Arts Volume33
प्रातः स्मरण स्तोत्रम्
श्रीमद्शंकराचार्य
प्रातः स्मरामि हृदिसंस्फुरदात्मतत्त्वं
सच्चित्सुखं परमहंसगतिं तुरीयम् ।
यत् स्वप्न जागर सुषुप्तमवैति नित्यं
तद्ब्रह्मनिष्कलमहं न च भूतसङ्घः ॥१॥
prātaḥ smarāmi hṛdi saṃsphurad ātmatattvaṃ
saccit sukhaṃ paramahaṃsa-gatiṃ turīyam .
yat svapna jāgara suṣuptam avaiti nityaṃ
tad brahma-niṣkalam-ahaṃ na ca bhūta-saṅghaḥ .. 1 ..
प्रातर्भजामि मनसा वचसामगम्यं
वाचो विभान्ति निखिला यदनुग्रहेण ।
यन्नेति नेति वचनैर्निगमा अवोचुः
तं देवदेवमजमच्युतमाहुरग्र्यम् ॥२॥
prātar bhajāmi manasā vacasāmagamyaṃ
vāco vibhānti nikhilā yad anugraheṇa .
yanneti neti vacanairnigamā avocuḥ
taṃ devadevam ajam acyutam āhuragryam .. 2 ..
प्रातर्नमामि तमसः परमर्कवर्णं
पूर्णं सनातनपदं पुरुषोत्तमाख्यम् ।
यस्मिन्निदं जगदशेषमशेषमूर्तौ
रज्वां भुजङ्गम् इव प्रतिभासितं वै ॥३॥
prātar namāmi tamasaḥ param arkavarṇaṃ
pūrṇaṃ sanātana padaṃ puruṣottamākhyam .
yasminnidaṃ jagad aśeṣam aśeṣamūrtau
rajvāṃ bhujaṅgam iva pratibhāsitaṃ vai .. 3 ..